Навошта брэндаваць стартап з самага пачатку?

Развагі арт-дырэктара кампаніі PRAS Аляксей Кульбіцкага на актуальную для новых бізнесаў тэму

дата публікацыі
21.05.2018
aside.source

Гэта адбылося: у вашую галаву пагрукалася ідэя, увасобіць якую вы вырашылі ў выглядзе стартапу. І здаецца вам, што вычварацца не мае сэнсу: задума настолькі класная, што не мае патрэбы ў суправаджэнні, абгортцы, вопратцы, шаліку. Хопіць схематычных чорна-шэрых квадратаў. Патэнцыйны інвестар выслухае, убачыць, пачуе і інвестуе. Распрацоўка ўпэўнена пройдзецца па сусветных рынках. І вось тады ўжо можна будзе падумаць пра брэндаванне.

І гэта ніколькі не дрэнна — калі не верыць у тое, што ідэя стрэльне, то няма сэнсу пачынаць сваё пачынанне. Але справа ў тым, што канцэпцыя брэнду нашмат шырэй і глыбей, чем яе разумее большасць бізнесоўцаў-пачаткоўцаў.

Стартап-стартап, а для чаго табе такі прыгожы лагатып?

1. Каб лепш пачулі

Праблема ў тым, што калі вашая ідэя сапраўды новая (і несумненна заслугоўвае ўкладанняў), інвестары і карыстальнікі наўрад ці адразу змогуць паглыбіцца ў сутнасць, ацаніць унутраную моц і ўбачыць перспектыву. Якімі праніклівымі яны б ні былі. І менавіта брэндаванне дапаможа вам патлумачыць, якім чынам вы збіраецеся зрабіць свет больш добрым, моцным і чыстым: брэнд паказвае канцэнтрацыю вашай задумы і адначасова працуе з эмоцыямі мэтавай аўдыторыі — чалавек зразумеў, расчуліўся, прыняў.

Бо што такое брэнд — вы ж не падумалі, што гэта лагатып прыгожы або колеры фірмовыя.

Брэнд — гэта лінія і межы, у якіх і па якіх будуецца ўсё, што вы робіце. 

Гэтае «усё» пачынаецца з прэзентацыі яшчэ не створанага або не даведзенага да ладу дадатку-сэрвіса. Вам давядзецца паказваць яе шматкроць, навучыцца адначасова са з'яўленнем новага слайду біць сябе ў грудзі, кажучы: «Гэта інавацыйна!».

Дык вось: прэзентацыя ўжо мае быць брэндаванай. Старонкі з графікамі і схемамі, аформленыя ва ўнісон з вашым дадаткам: 

  • Па-першае, дэманструюць актуальную працу стваральніка стартапу па аналітыцы — у супрацьвагу капіпасце мутных графікаў з сеціва.
  • Па-другое, падкрэсліваюць здольнасць выразна і адным патокам данесці думку.
  • Па-трэцяе, з такім жа афармленнем, як і ў самога прадукту, пра які яны распавядаюць, старонкі карысныя ў якасці матэрыялу для стыхійнай рэкламы: калі прэзентацыя адбудзецца ў межах якога-небудзь форуму кшталту «Тыдня стартапера», слайд можа трапіць у аб'ектыў журналіста і апынуцца ў медыярэсурсе.

Да таго ж, падчас прадумвання легенды і шыфравання ў вобразах абяцанняў карыстальнікам, вы будзеце час ад часу кідаць крытычныя погляды на мэты і задачы свайго бізнесу, цалкам магчыма, перафармулюеце частку з іх, быць можа, увогуле зменіце назву, перабіраючы гукавыя асацыяцыі, якія яна вызывае ў вас і тэарэтычна можа вызваць у іншых.

2. Каб правільна зразумелі

Тое, што працуе ў Беларусі, можа не працаваць у Еўропе, Азіі ці Амерыцы, апынуцца не прынятым у арабскіх краінах. Адрозніваюцца шрыфты, якія заўважаць, напрыклад, амерыканцы і вылучаць данцы; адрозніваюцца ўзроўні прымальнага, парогі ўваходжання, этычны вопыт. 

Уключылі этап распрацоўкі брэнду ў падрыхтоўку да запуску — значыць, заняліся даследваннямі і абіраеце інтанацыю, з якой зможаце размаўляць пра стартап з прадстаўнікамі розных культур. Тэлефануеце сябрам у Наваградак, Сан-Марына, Орхус, В'енцьян, Кіёта, Сан-Хасэ, Перу і Марока. Вывучаеце традыцыі і правілы, згодна з якімі ў розных рэгіёнах вядзецца бізнес. І рана ці позна, але прыходзіце да збалансаванага спалучэння спецыфічнага і мультыкультурна-арыентаванага.

Прыклад — няўдалая рэклама Coca-Cola у Саудаўскай Аравіі. Стваральнікі не ўлічылі, што чытаюць там справа налева, і ідэя «ляжаў у пясках знясілены — выпіў колу — падняўся і пабег» інвертавалася: «узбіваў вяршыні барханаў — глытнуў коку — сышоў у астрал».

Чытаць далей у крыніцы

наступны раздзел сайта
у якім

прыводзяцца прыклады рэальных праектаў,
над якімі працавала каманда PRAS